Grasia, Amor i Komunion

"E grasia di Señor Hesu-Kristu, i e amor di Dios, i e komunion di Spiritu Santu sea ku boso tur. Amèn" (2 Kor. 13:14, NKJV). Ku e versíkulo akí, Pablo ta terminá su di dos karta. Nota ku e ta menshoná e tres Personanan di e Trinidat den e órden akí: Yu, Tata, i Spiritu Santu. Ta pa medio di e trabou di tur tres nos por komprondé mihó kon Dios ta i kiko El a hasi pa nos.

Lesa Juan 3:16,17; Romanonan 8:37-39; i 1 Juan 4:8-11. Kiko e pasashinan akí ta bisa nos tokante e amor di Dios?

1 Juan 4:8 ta bisa ku “Dios ta amor.” Amor ta un atributo esensial di Dios. Juan ta enfatisá ku nos por konosé amor den sentido ku Dios a duna Su úniko Yu pa muri pa nos (Juan 3:16). Dios a manda Hesus riba un mishon di reskate (Juan 3:17), i esaki tabata parti di e proyekto di salbashon (Echonan 3:20-21; 1 Juan 4:10,14). Hesus a referí na e Tata vários biaha den e Evangelionan komo Esun ku a mand’E (Mat. 10:40, Marko 9:37).

Den un deklarashon remarkabel, Pablo ta bisa: “Dios ta demostrá su mes amor pa nos den esaki: Miéntras nos tabata pekador ainda, Kristu a muri pa nos” (Rom. 5:8, NIV). Nos por vislumbrá e amor di Dios den e dushi relashon entre esposo i esposa, komo tambe mayornan i nan yunan, den Amistatnan sinsero, etcetera. Tambe nos por mira e amor di Dios den naturalesa. Respekto esei, Ellen G. White ta bisa: “ ‘Dios ta amor’ ta skirbí riba kada brote ku ta habri, riba kada punta di yerba ku ta brota. E paranan bunita ta hasi e aire vokal ku nan kansionnan felis, e flornan, delikadamente tintá den nan perfekshon ta perfumá e aire, e matanan haltu di e mondi ku nan blachinan riku di bèrdè bibu, tur ta testifiká di e kuido tierno i paternal di nos Dios i di Su deseo pa hasi Su yunan felis."--Steps to Christ, p. 10.

Sinembargo, nada ta mas konvinsente ku e echo ku Dios a duna Hesus komo sakrifisio pa nos pikánan. Ora nos komprondé ku Dios a stima nos te na e punto di manda Hesus pa entregá Su bida pa nos, nos kontesta ta boluntat “pa entregá nos bida pa nos rumannan” (1 Juan 3:16, ESV).

Pablo tabata ke pa e korintionan biba den unidat. Sinembargo, sin amor, no tin unidat. Ta p’esei el a siña nan ku “amor ta edifiká” (1 Kor. 8:1, ESV) i ku sin amor, tur kos ta inútil i bashí (1 Kor. 13:1-3). Asina, tur loke nos ta hasi mester ser hasí den amor (1 Kor. 16:14), un amor ku ta un ekstenshon di e amor di Dios.

Den e mundu pagano antiguo hende no tabata kere ku e diosnan tabata stima hende. En kambio, e diosnan tabata maligno i furioso, i tabata suponé di ser trankilisá. E idea di un Dios di amor, manera nos ta mira den Beibel, tabata un nobedat. Pa sorprendente ku e deklarashon akí tabata den su tempu, Pablo ta karakterisá nos Dios komo “e Dios di amor i pas” (2 Kor. 13:11).

Lesa 2 Korintionan 13:11. Kon bo por saka speransa for di loke ta ser bisá aki? Kon bo por eksperensiá mihó loke e versíkulo akí ta siña?

E frase “e Dios di amor i pas” por ser interpretá na dos diferente manera. Na un banda, Dios ta ser mirá komo e fuente di amor i pas. Na otro banda, Dios ta karakterisá pa amor i pas. No ta nesesario, sinembargo, pa disidí entre e dosnan. Pasobra amor i pas ta karakterístikanan intrínseko di Dios, E ta duna nos amor i pas.

Na otro kaminda, Pablo ta referí na Dios komo “e Dios di perseveransia i enkurashamentu” (Rom. 15:5, ESV); “di speransa” (Rom. 15:13, ESV); “di pas” (Rom. 15:33, Rom. 16:20, 1 Kor. 14:33, Fil. 4:9, 1 Tes. 5:23), “e Tata di mizerikòrdia” (2 Kor. 1:3), i “e Dios di tur konsuelo” (2 Kor. 1:3). Dios ta e fuente di tur e bendishonnan akí. E ta duna nos nan tur pa medio di Su amor infalibel.

Tambe, aunke e frase “Dios di pas” ta algu komun den Beibel, e frase “Dios di amor” ta aparesé solamente aki (2 Kor. 13:11), i, por lo tantu, e meresé nos reflekshon di mas profundo.

Manera hopi intérprete a nota, Pablo su referensia na e Dios di amor algun versíkulo promé ku e bendishon trinitario den 2 Korintionan 13:14 ta sugerí ku e ta pensa di Dios komo tres Persona. “Aunke e ta usa e palabra ‘Dios’ aki komo un di e tresnan, su komprondementu di Hesus i e Spiritu otro kaminda den su kartanan ... ta fòrsa nos pa mira henter e frase komo ku ta deskribí e úniko Dios kende e iglesia primitivo a bin ta mira den forma tripel. Lo tabata mas ku un siglo promé ku teólogonan ... a kuminsá usa palabranan manera ‘trinidat’ komo un manera kòrtiku di ekspresá loke Pablo ta artikulando kaba.”--Tom Wright, Pablo pa Tur Hende: 2 Korintionan (London: Sosiedat pa Promové Konosementu Kristian, 2004), p. 148.

Nos ta kere den ún Dios, e unidat di tres Persona ku ta biba eternamente den un relashon di amor. E Dios triuno akí ta stima nos i ta konvoká nos pa stima otro na un manera ku ta reflehá e amor entre e Tres Miembronan di e Divinidat.

E grasia di Hesus no solamente ta revelá e amor di Dios pa nos sino tambe ta trese e komunion di e Spiritu komo un efekto mas aleu di e amor ei. Na mes momento, komunion tin su fuente den e amor di Dios. I esei ta pasobra sin amor, no tin komunion. Manera Pablo ta skirbi: “P’esei, si tin kualke konsuelo den Kristu, si tin kualke konsuelo di amor, si tin kualke komunion di e Spiritu, si kualke afekto i mizerikòrdia, kumpli ku mi goso dor di ta di mesun pensamentu, teniendo e mesun amor, siendo di un akuerdo, di un mente” (Fil. 2:1-2, NKJV).

Algun hende ta bisa ku Spiritu Santu ta solamente un forsa òf influensia, pero esei no por ta bèrdat. Al fin i al kabo, dikon Pablo lo a menshoná dos persona, e Tata i e Yu, huntu ku un simpel “forsa” den un fórmula trinitario? Esei lo no tin sentido. Meskos ku e Tata i e Yu ta ser presentá den un relashon personal (2 Kor. 1:3, 2 Kor. 11:31), e relashon di e Spiritu ku personanan ta hiba nos na e konklushon ku E ta un persona tambe (Rom. 8:15-16; lesa tambe Juan 14:16-17,26; Juan 15:26).

E frase “komunion di e Spiritu” (Fil. 2:1) por ser komprondé na dos manera. E por nifiká komunion un ku otro otorgá pa e Spiritu, òf komunion ku e Spiritu mes. Vários intérprete di Beibel ta argumentá ku e sentidonan akí no ta mutuamente eksklusivo. Al fin i al kabo, komunion un ku otro ta konsekuensia di komunion ku e Spiritu.

Lesa 1 Korintionan 2:10,11; 1 Korintionan 3:16; 1 Korintionan 12:11; i 2 Korintionan 3:6,17. Kiko Pablo a siña e korintionan tokante e Spiritu?

Pablo tin hopi di bisa tokante e obra di e Spiritu. Den 1 i 2 Korintionan tin mas ku kuarenta referensia na Spiritu Santu. Spiritu Santu ta promové edifikashon di e iglesia (1 Kor. 14:12), ta kapasitá hende pa mishon (1 Kor. 2:4-5), ta revelá e kosnan profundo di Dios na nos (1 Kor. 2:10-11), i ta siña nan na nos (1 Kor. 2:13), ta biba den nos (1 Kor. 3:16, 1 Kor. 6:19), ta traha ku Kristu pa nos hustifikashon (1 Kor. 6:11), ta otorgá donnan spiritual na e iglesia (1 Korintionan 12-14), ta seya nos pa salbashon (2 Kor. 1:22), ta imprimí e lei den kurason humano (2 Kor. 3:3), i ta duna bida nobo den Kristu (2 Kor. 3:6), i libertat for di piká (2 Kor. 3:7). Sigur, nos no por biba sin Spiritu Santu.

Ora ta lesa 2 Korintionan 13:14, un hende por pensa ku Kristu ta e úniko fuente di grasia, Dios ta e úniko fuente di amor, i Spiritu Santu ta e úniko fuente di komunion, pero nada por ta mas leu for di e bèrdat.

Lesa 1 Korintionan 1:3-4,9; 1 Korintionan 10:16; 2 Korintionan 1:2,12; Romanonan 8:35; Romanonan 15:30; Galationan 2:20; i Efesionan 3:19. Kiko e pasashinan akí ta bisa tokante grasia, amor, i komunion en konekshon ku e miembronan di Trinidat?

Tata, Yu i Spiritu Santu ta traha huntu pa nos salbashon. Grasia, amor i komunion no ta bini di solamente un sino di e Tres Miembronan di e Divinidat. Sinembargo, kada un tin funshonnan spesífiko den e historia di salbashon. Pablo ta konsiente di esei i ta enfatisá e siñansa akí den su kartanan. Por ehèmpel, e plan di salbashon ta ser kontá ku un ekonomia di palabra inkreibel den Galationan 4:4-6, ku e partisipashon respektivo di e Tres Miembronan di e Divinidat. Dios Tata a manda Hesus, loke ta sugerí ku e Tata ta e Fuente di e plan ei (Gal. 4:4). E Yu a nase di un muhé (Gal. 4:4), kua ta un referensia na e Enkarnashon i ta mustra riba e kumplimentu di un promesa antiguo (Gen. 3:15). E Yu a redimí nos i a trese nos bèk na e relashon korekto ku e Tata, tokante ken Satanas a gaña (Gen. 3:5). I Spiritu Santu ta legitimá nos identidat komo yunan di Dios (Gal. 4:6).

Tin vários otro referensia na e Trinidat den e kartanan paulino. E tresnan ta aktua huntu, kapasitando e iglesia pa mishon (1 Kor. 12:4-6), dunando nos forsa spiritual (Efe. 3:14-19), i promoviendo un unidat profundo entre miembronan di iglesia, unu ku ta repliká e unidat ku ta marka e relashon mes di e miembronan di e Divinidat (Efe. 4:4-6). Den komprondementu di Pablo, no solamente Dios ta triuno, sino tambe e tres Personanan di e Divinidat ta traha huntu pa nos salbashon (Efe. 1:3,13,14). Den Efesionan, Pablo ta bai asina leu di menshoná ku nos mester ta yená ku e plenitut di e Tata (Efe. 3:19), e Yu (Efe. 4:13), i Spiritu Santu (Efe. 5:18).

Ora el a trese e korespondensia ku e korintionan na un fin (2 Kor. 13:14), Pablo no por a kaba ku un mihó final: un promesa ku e tres Dignatarionan di universo, e Trio selestial, lo ta ku nos awor i den e siglo ku ta bini.