Lès 1

* 26 di sèptèmber — 2 di òktober

E Kreador ta Papia

Sabat

26 di sèptèmber

Lesa pa e Estudio di e Siman Akí:

Gen. 1:27,28; Gen. 3:1–8; Lukas 15:11–32; Gen. 3:14–24; Eks. 19:16–22; Juan 10:27–30.

Versíkulo di Memoria:

“Dios, kende na vários tempu i na vários manera a papia den tempu pasá ku e tatanan pa medio di e profetanan, a papia den e último dianan akí ku nos pa medio di Su Yu, kende El a nombra komo heredero di tur kos, pa medio di ken tambe El a traha e mundunan” (Hebreonan 1:1,2, NKJV).

Teknologia digital ta pèrmití hopi di nos mira amigu- i parientenan na lugánan leu. Esaki ta bon. Pero, tòg, kuantu mihó pa topa en persona! Tin algu spesial ku ta pasa ora nos ta bin huntu, interkambiá brasa i papia kara kara.

E siman akí nos lo keda rekordá ku sernan humano a ser kreá pa un relashon kara kara ku nan Kreador. Piká, sinembargo, a destruí e konekshon íntimo akí hopi tempu pasá. Pa restourá e komunikashon ei ku Su kriaturanan stimá, Dios a proveé maneranan pa papia ku nos. Su forma di mas rekonosé di interakshon divino ku humanidat ta boseronan kuidadosamente skohí, konosí komo profetanan, ku ta revelá Su mensahenan na nos. Hopi bia e profetanan akí tin eskritonan den Beibel, pero no semper.

Dios su plan final ta pa restourá Su imágen den nos, e imágen ku piká a plama for di otro. Esaki ta loke e plan di salbashon ta trata di dje: restourashon, un restourashon ku lo ta kompleto ora Dios krea “shelunan nobo i un tera nobo den kua hustisia ta biba” (2 Pe. 3:13, NKJV).

Te na e dia ei, Dios ta papia ku nos ainda, i E ta usa Su profetanan pa hasi nèt esei.

Djadumingu

27 di sèptèmber

Komunikashon den Eden

Génesis 1 i 2 ta konta e storia di Kreashon. Dios a krea un mundu bunita, i den dje El a pone Adam i Eva, e akto kulminante di Kreashon. Hende tabata diferensiá for di tur otro kriatura riba tera pasobra nan a ser trahá “den imágen di Dios” (Gen. 1:27, NKJV), algu bisá solamente tokante nan i no, por ehèmpel, tokante e paranan òf tokante otro animalnan. Komo tal, nan mester a biba bidanan totalmente abundante, eksperensiá amor den tur su formanan, i kana den komunion ku Dios Mes.

Tambe, nos ta lesa den Génesis 2:18–23 ku Dios a krea Eva pa Adam pasobra, Dios a bisa, no tabata “bon pa hende ta su so” (Gen. 2:18, NKJV). For di prinsipio, antó, hende a ser kreá komo sernan sosial. Sosiólogonan awendia ta siña ku interakshon humano ta proveé numeroso benefisio na nos bienestar físiko i mental, miéntras ku soledat ta un asesino.

No ta nada straño, antó, ku despues di kreashon di Eva, Adam a sklama: “Esaki ta awor wesu di mi wesunan i karni di mi karni; e lo ser yamá Muhé, pasobra el a ser tumá for di Hòmber” (Gen. 2:23, NKJV). E struktura familiar establesé pa un hòmber i un muhé uní den matrimonio ta e promé institushon sosial ku Dios a proveé pa hende, pa asina nan eksperensiá relashon i komunion holístiko. No ta nada straño ku un di e metanan prinsipal di Satanas semper tabata pa destruí e dinámika fundamental di e famia original.

Lesa Génesis 1:27,28; Génesis 2:15-17; i Génesis 3:9. Ki tipo di komunikashon tabata eksistí entre Dios i hende den Hòfi di Eden?

Adam i Eva a disfrutá di komunion kara kara ku Dios. Komo sernan inteligente, nan por a topa ku Dios i skucha Su instrukshonnan. Komo mayordomonan di e hòfi maravioso di Dios, nan a krese den konosementu i abilidat segun ku nan tabata kuida e flora i founa bibu. Kada dia nan tabatin tambe tempu spesial ku Dios “den e fresku di dia” (Gen. 3:8). E dia di Sabat en partikular, un parti esensial di e akto kreativo di Dios, mester tabata un tempu di komunion spesialmente dediká entre Dios i Su yunan (Gén. 2:2,3; Eks. 20:8–11). Riba e dia ei, nos promé mayornan tabata eksperensiá Dios su amor i kuido pa nan na un manera spesial.

Djaluna

28 di sèptèmber

Skondiendo pa Dios

Pasobra Dios ta amor (1 Juan 4:8), E lo no a krea “robòtnan” humano. Amor ta brasa eskoho. Pa por a stima, Adam i Eva mester a ser kreá ku boluntat liber; di otro manera, amor, amor berdadero, lo tabata imposibel pa nan duna.

Pues, Adam i Eva tabatin e libertat pa obedesé òf desobedesé nan Kreador. E realidat di e eskoho liber akí a ser deskribí den e mandato pa no kome for di e palu di konosementu di bon i malu (lesa Gen. 2:15–17). Dikon atvertí nan kontra kome di dje a ménos ku nan tabatin e libertat pa hasi esei na promé lugá?

“Nos promé mayornan, aunke kreá inosente i santu, no a ser poné mas ayá di e posibilidat di hasi malu. Dios a hasi nan agentenan moral liber, kapas pa apresiá e sabiduria i benevolensia di Su karakter i e hustisia di Su rekerimentunan, i ku pleno libertat pa sede òf retené obediensia. Nan mester a disfrutá di komunion ku Dios i ku angelnan santu. Sin libertat di eskoho, nan obediensia lo no tabata boluntario, sino fòrsá.”—Ellen G. White, Patriarchs and Prophets, pp. 48,49.

Dikon Adam i Eva a purba skonde pa nan Kreador despues ku nan a desobedes’E? Lesa Génesis 3:1–8 (kompará ku Jer. 23:24 i Hebr. 4:13).

Génesis 3 ta deskribí un esena spantoso: e kaida di Adam i Eva. Despues di e kombersashon épiko entre e kolebra (Satanas) i Eva, nos promé mayornan a ser tentá pa kome di e palu di konosementu di bon i malu, kua nan a ser prohibí di hasi. Satanas a usa e poder di palabra, emoshon i tentashonnan plasentero pa konvensé Eva, ku despues a konvensé Adam, pa bai kontra e mandato di Dios. Eva a nota ku e palu tabata “bon pa kuminda,” “agradabel pa bista,” i “deseabel pa hasi un hende sabí” (Gen. 3:6, NKJV). E promesa di Satanas ku nan lo tabata “meskos ku Dios, konosiendo bon i malu” (Gen. 3:5, NKJV), tabata zona iresistibel.

En realidat, e diskurso di Satanas tabata yen di eror. Satanas a skonde pa nan e konsekuensianan di nan desobedensia. Despues ku nan a desobedesé Dios, mesora nan wowonan “a habri,” i nan a mira ku nan tabata “sunú.” Dios su “paña” di lus i gloria (Sal. 104:1,2), ku tabata reflehá e “imágen” divino, a bai. Nan no tabata kubí mas dor di loke Dios a proveé pa nan. No ta nada straño ku Adam i Eva a skonde nan mes pa nan Kreador (komo si fuera realmente tabata posibel pa skonde pa Dios). Nan a purba skonde pasobra piká ta pone nos sinti kulpabel i, den nos kulpa, nos ke hui for di e presensia di Dios.

Djamars

29 di sèptèmber

Dios ta buska humanidat

Nos por mira for di Génesis 3:9,10 ku Dios a tuma e inisiativa pa buska Su yunan kaí. E pregunta “Unda bo ta?” tabata retóriko, pasobra Dios tabata sa kiko Adam i Eva a hasi i unda nan tabata. Piká, sinembargo, a kibra e komunikashon usual ku tabata eksistí entre E i e promé pareha humano. Dios su preokupashon inmediato tabata pa restourá komunikashon ku Su yunan, pa topa ku nan, i pa duna nan speransa den nan desesperashon. De echo, e verbo hebreo qara’, “yama,” den Génesis 3:9, ta ser usá hopi biaha pa deskribí e yamada di Dios pa establesé komunikashon ku Su pueblo.

Lesa Lukas 15:11-32. Kon e parabel akí ta reflehá loke a pasa den Génesis 3:9,10?

Dios su buskamentu di Adam i Eva ta revelá Su amor inkondishonal pa Su yunan. Dios nunka ta entregá riba nos (lesa Lukas 15). E ta hasi hopi esfuerso pa restablesé Su komunion ku nos, asta ora nos bai skonde. Promé ku Hesus su krusifikashon, ora Pedro a nenga Hesus tres biaha, Kristu “a bira wak” e (Lukas 22:61, NKJV). Asta sin palabra, El a “papia” ku Pedro i a buska pa alkansá Su amigu ku a dual.

Nota, den Génesis 3:11–13, kon piká diripiente a kambia e relashon di Adam i Eva. En bes di konfesá nan piká individual, nan a kuminsá kulpa otro. Adam a kulpa Eva i, indirektamente, Dios, pasobra El a dun’é Eva. “E muhé ku Bo a duna pa ta huntu ku mi, el a duna mi di e palu, i mi a kome,” el a bisa (Gen. 3:12, NKJV). Eva, miéntrastantu, a kulpa e kolebra pa su desobedensia. “E kolebra a gañami, i mi a kome” (Gén. 3:13) tabata su èksküs. Ningun di nan, a lo ménos ora nan a ser konfrontá pa nan piká pa promé biaha, a aseptá nan mes kulpa. Kon tiki kos a kambia den seis mil aña.

Realidat ta ku piká a afektá tur ser humano. Apòstel Pablo ta deskribí nos kondishon bon den Romanonan 7:15–24, ora el a detayá e doló di deseá di hasi loke ta korekto, pa despues haña su mes ta hasi lo kontrario: “Pasobra loke mi ta hasi, mi no ta komprondé. Pasobra loke mi ke hasi, esei mi no ta praktiká; ma loke mi ta odia, esei mi ta hasi” (Rom. 7:15, NKJV).

Ken no por relashoná?

Loke Pablo ta bisa ta profundo. Nos tur ta hendenan kibrá ku ta sigui hasi kosnan ku nos sa ku nos no mester hasi. Ken no a eksperensiá e realidat akí?

Nos úniko speransa, Pablo ta bisa, ta liberashon “pa medio di Hesu-Kristu nos Señor” (Rom. 7:25). Ta p’esei Dios ta sigui buska nos pa hiba nos na Hesus, kende so por forma nos den Su imágen i salba nos di e devastashon kousá pa piká.

Djárason

30 di sèptèmber

Ekspulsá For di e Hòfi

Un di e konsekuensianan di mas devastador di e piká di Adam ku Eva tabata separashon for di Dios. Nan a ser ekspulsá for di e Hòfi i no por a papia kara kara ku Dios mas. Profeta Isaias a skirbi di forma memorabel tokante e kondishon humano desafiante akí: “Boso inikidatnan a separá boso for di boso Dios; i boso pikánan a skonde Su kara for di boso” (Isa. 59:2, NKJV).

Den bèrdat, Adam i Eva tabata yunan di Dios ainda. Sinembargo, e resultado di piká no por a ser evitá, i nan mester a bandoná Eden. Nada tabata meskos despues di nan desobedensia.

Piká a kambia humanidat na hopi manera (lesa Gen. 3:14–24 ). Pero kon piká spesífikamente a kambia nos komunikashon ku Dios? (Lesa tambe Eks. 19:16–22.)

Piká a kambia bida humano kompletamente na maneranan ku nos no por imaginá, i esei ta pasobra tur loke nos konosé ta un mundu di piká. Pa motibu di piká, e tera e ser “maldishoná” i mester a produsí “sumpiña i mata di sumpiña.” Hende lo a eksperensiá doló awor, i nan lo mester a “soda” pa asina proveé kuminda pa nan mes, pa finalmente muri i regresá na tera. Di tur e rekordatorionan di piká, morto ta keda esun di mas poderoso. Na mes momento, tambe, nos a pèrdè nos komunikashon kara kara ku Dios pa motibu di piká.

Sinembargo, Adam ku Eva a ser primintí un solushon pa kontrarestá e destrukshonnan di piká. Aunke nos promé mayornan lo no a mira i papia ku Dios direktamente, nan a bandoná Eden ku speransa pa presente i futuro. Dios a tuma e inisiativa i a splika nan Su plan di reskate.

Génesis 3:15, loke a ser yamá “e promé promesa di e evangelio,” tabata yená ku speransa pa nan (i pa nos), apesar di loke a pasa. E promesa di un Redentor ku ta bini lo a proveé enemistat presente kontra piká i speransa pa e futuro salbashon di humanidat. De echo, Dios su provishon di paña pa Adam i Eva promé ku nan a bandoná e Hòfi tabata un akto simbóliko ku ta deskribí nan futuro redenshon. Pa medio di e futuro morto i resurekshon di Hesus, komunion ku Dios mester a ser restourá (Juan 14:1–3).

Es desir, nèt einan den Eden, djis despues di e entrada di piká, humanidat a ser duná e speransa i promesa ku e problema di piká finalmente lo a ser solushoná. Asina ku tabatin piká, tabatin e promesa di un Salbador.

Djaweps

1 di òktober

Bosero di Dios

Kiko e siguiente tekstonan ta revelá tokante kon Dios a papia ku humanidat despues di entrada di piká? (Lesa Hebr. 1:1,2; Rom. 1:19,20; Num. 12:6; 2 Tim. 3:16,17; Juan 14:7–9; Juan 10:27–30 .)

Apesar di piká, Dios a haña hopi manera pa komuniká ku sernan humano kaí. Un manera ku Dios ta revelá Su mes na nos ta atraves di kreashon. Naturalesa ta un revelashon poderoso di Su aktonan maravioso. Sientífikonan ta keda asombrá pa e maravianan di nos universo i pa e komplehidat di asta e bida “di mas simpel.” Sinembargo, naturalesa ta desplegá tambe e konsekuensianan di e Kaida, ku morto di kada kos bibu e ehèmpel mas poderoso.

Un otro manera ku Dios a papia ku humanidat ta pa medio di e profetanan, individuonan ku El a skohe komo Su boseronan. Por ehèmpel, Dios a papia ku Noe, Abraham, Moises i Daniel, revelando Su boluntat pa Su pueblo. Den nan núkleo, e mensahenan profétiko di Dios ta un rekordatorio ku E no a lubidá Su yunan i ta ku nan ainda. I aunke algun di e profetanan a skirbi loke a yega serka nos komo Skritura, otronan nunka a skirbi ningun buki di Beibel.

Sinembargo, hopi di e palabranan di e profetanan a ser komuniká atraves di Skritura (2 Tim. 3:16,17). Beibel ta un revelashon di Dios Mes. Ta pa medio di Su palabranan ku nos ta siña ken E ta, mira Su amor implakabel, i deskubrí Su guia pa kon nos mester biba.

Ademas, ta mediante Beibel nos ta komprondé ken nos ta, di unda nos a bini i unda nos ta bai. Einan nos ta haña e propósito di Dios pa nos bida.

Pero e manera di mas efikas den kua Dios a papia ku nos ta pa medio di Hesu-Kristu, kende, naturalmente, ta ser revelá na nos den Beibel. Manera Dios a buska Adam i Eva den Hòfi di Eden, asina Kristu a bini pa “buska i salba e loke tabata pèrdí” (Lukas 19:10). “Esun ku a miraMi a mira e Tata,” Hesus a deklará (Juan 14:9, NKJV). Pa medio di Su bida, morto i resurekshon, Kristu a kumpli ku e promesa duná na Adam i Eva den Eden. El a bin i a muri na nos lugá pa asina nos por tin bida eterno pa medio di djE.

Despues di Hesus su asenshon na shelu, Spiritu Santu a sigui guia nos “den tur e bèrdat” i papia ku nos di “loke mester bini ainda” (Juan 16:13, NIV).

Djabièrnè

2 di òktober

Pa mas Estudio

Dios su komunikashon no ta limitá na tempunan bíbliko. Manera nos lo mira den e próksimo simannan, Dios ta papia ku sernan humano den perpetuidat, i Su palabranan lo ser manifestá den formanan moderno te ora Kristu regresá.

Ellen Gould Harmon (White) i su ruman muhé oochi, Elizabeth, a nase dia 26 di novèmber 1827 na Gorham, Maine. Nan tabata esnan di mas chikitu di ocho yu ku a nase di Robert i Eunice Harmon. Den algun aña, e famia a muda pa e stat di Portland, Maine, kaminda Robert Harmon tabata spera di ekspandé su negoshi di traha sombré. Na edat di nuebe aña, Ellen a sufri un leshon ku a afekt’é físikamente, emoshonalmente i sosialmente. Miéntras e tabata den un parke serka di su kas, un kompañero di klas rabiá a tira un piedra ku a dal e den su kara, lagando Ellen den un estado semikonsiente pa vários siman. E aksidente akí a pone un fin na su edukashon formal abruptamente i a lag’é ku retonan di salú pa henter su bida. E leshonnan na kara tambe a laga Ellen konsiente di su mes tokante su aparensia, limitando su interakshonnan sosial.

Ta den e konteksto di insertidumbre akí ku e hóben Ellen Harmon a kuminsá pensa riba su destino spiritual. E tabatin miedu di Dios i tabata sintié indigno di shelu. Sintimentunan di miedu asina a intensifiká ora famia Harmon a aseptá e doktrina Millerita di e pronto segundo binida di Hesus. Asta despues di su boutismo pa medio di inmershon den Iglesia Metodista na 1842, Ellen no a sinti su mes digno di e amor di Dios. E tabata kere ku e tabata “pèrdí pa semper” (Life Sketches of Ellen G. White, p. 29; tambe lesa pp. 20–31).

Meimei di e pensamentunan agonisante akí, e hóben Ellen tabatin dos soño ku a kuminsá kambia su pensamentu tokante Dios. Pero no tabata te ora el a topa Levi Stockman, un predikadó metodista, ku el a komprondé i sinti e amor i grasia di Dios. Tabata komo si fuera Dios a papia kuné den su desesperashon. “Fe awor a tuma poseshon di mi kurason,” el a skirbi despues. “Mi a sinti un amor inekspresabel pa Dios i tabatin e testimonio di Su Spiritu ku mi pikánan tabata pordoná. Mi punto di bista di e Tata a kambia. Awor mi tabata mir’E komo un mayor bondadoso i tierno, mas bien ku un tirano severo ku ta obligá hende na un obediensia siegu. Mi kurason a bira na djE den un amor profundo i ferviente.”— Life Sketches of Ellen G. White , p. 39. Na mes momento, Ellen White a komprondé tambe e doktrina di e “estado di e mortonan” i gradualmente a kapta e idea ku no tabatin un fièrnu ku ta kima pa semper. Su komprondementu nobo di Dios i Su amor a kambia su aktitut kompletamente. Manera nos lo siña tur djabièrnè den e simannan benidero, Ellen White a namorá profundamente di Hesus i a sirbiE pa restu di su bida.

Pa deskubrí mas, bishitá: whiteestate.org/absg/1.