Neurosientífikonan a kuminsá komprondé e fasilidat maravioso di bebi humano pa atkisishon di idioma. Na edat di 6 luna, un bebi por komprondé e zonidonan ku ta komponé palabranan ingles, òf palabranan di kualke di e otro 7.000-plùs idiomanan papiá. Si nan ser eksponé na un di dos idioma, nan por atkerí e idioma ei tambe. Durante e periodo akí un porta mental misterioso ta habri, pèrmitiendo bebi pa distinguí e 40 òf mas zonidonan ku generalmente ta forma un idioma nativo for di e 800 diferente zonidonan ku nan por persibí na nasementu. Pero tin un problema: mester papia ku bebi. Lo bo por yam’é lèsnan di bos pa bebi resien nasí.
Dikon Dios lo a krea nos ku e kapasidat maravioso akí pa rekonosementu di abla i atkisishon di idioma si nunka E tabatin intenshon di papia ku nos? E pregunta ta retóriko, naturalmente, pasobra Beibel ta deklará: “Dios, kende na vários tempu i na vários manera a papia den tempu pasá ku e tatanan pa medio di e profetanan, a papia ku nos den e último dianan akí pa medio di Su Yu, kende El a nombra komo heredero di tur kos, pa medio di ken tambe El a traha e mundunan” (Hebr. 1:1,2, NKJV).
Ora piká a kibra e komunion di Adam i Eva ku Dios, E no a laba Su mannan di nan i laga e pareha kaí pa destruí nan mes. El a bin buska nan tur dos, puntrando Adam: "Unda bo ta?" (Gen. 3:9, NKJV). El a sigui profetisá tokante e nasementu di Un ku lo a salba mundu for di piká (Gen. 3:15). For di su inisio, einan mes den Eden despues di e Kaida, profesia a elevá Hesus i a mustra pekadornan riba djE, nan úniko speransa.
E kuartal akí nos lo studia e don di profesia, Dios Su inovashon ingenioso pa komuniká Su boluntat i kaminda na sernan humano ku a kai, ku no por komuniká kara kara mas kunE. E don spesial akí di Spiritu Santu ta ser menshoná prominentemente den 1 Korintionan 12, 1 Korintionan 14, Efesionan 4, i Romanonan 12. Spiritu Santu ta e Gran Dispensadó di esaki i tur otro donnan spiritual, “distribuyendo na kada un individualmente manera E ke” (1 Kor. 12:11, NKJV). Atraves di tempu, boseronan spiritualmente dotá a entregá mensahenan divino pa restourá i renobá nos relashon ku Dios, meskos ku Dios a hasi den Eden despues di e Kaida.
Nos lo siña kon Dios ta yama profetanan i kon nos por tèst nan outentisidat. Nos lo mira e similaridatnan i diferensianan entre profetanan di Tèstamènt Bieu i Nobo, i tambe haña un komprondementu funshonal di kon revelashon i inspirashon ta funshoná den nan bida. Miéntras algun profeta a papia, otronan a skirbi; algun a hasi tur dos. Nos lo analisá esakinan i otro maneranan di diskurso divino, nan implikashonnan, i e bendishonnan di obedesé e mensahenan ku e profetanan akí a entregá.
- Pa revelá Su mes, Su bèrdat, i Su boluntat pa humanidat kaí.
- Pa duna perspektiva i konseho tokante akontesimentunan i susesonan importante.
- Pa ekipá e kurpa di Kristu, e iglesia, pa mishon.
- Pa duna enkurashamentu spiritual na Su siguidónan.
- Pa spièrta pekadornan i yama nan na arepentimentu.
Dios ta asina invertí den guia e pèrdínan seif pa kas ku e don di profesia ta ser proveé pa e último dianan tambe (Joel 2:28-31). Atventistanan di e di Shete Dia ta kere, ku hopi bon motibunan, ku Ellen G. White, kofundadó di e iglesia, a ehersé un manifestashon moderno di e don profétiko.
Ta p’esei, huntu ku nos estudio di e don di profesia den Skritura, kada djabièrnè nos lo eksplorá e dinámika di Ellen G. White su yamada pa ministerio profétiko. Nos, komo iglesia, a haña e don maravioso akí. Kon nos por us’é mihó?
Sí, for di infansia padilanti, nos a ser designá pa ser papia kuné. Ki importante ta, antó, pa nos skucha loke e profetanan di Dios ta bisa nos!