Perla di Gran Presio

Aristoteles, un di e filósofonan i naturalista di mas grandi di mundu, a skibi bários buki di naturalesa. Na mas òf ménos 350 PK el a definí loke ta un araña: “Un araña ta un insekto chikitu ku tin seis pata”

Tur buki di estudio di insekto di e tempu ei en adelante a deskribí un araña komo un insekto chikitu ku tin seis pata. Durante dos mil aña, araña a ser klasifiká komo un insekto ku tin seis pata. Niun hende a pensa di konta su patanan. Dos mil aña despues, un naturalista ku yama Lamark a disidí di kue un araña pa konta kuantu pata e tin. Den e proseso el a deskubrí dos kos importante: Na promé lugá el a deskubrí ku un araña no ta un insekto, ma un aráknido. Na di dos lugá el a deskubrí ku un araña no tin seis pata, sino ocho.

Por siña 4 lès for di e storia aki:

1. No ta importá kon grandi un outoridat ta, e por kiboká su mes. No pasobra un gran hòmber a bisa algu, ta p’esei e ta asina.
2. Tempu no ta kambia e eror hasié bèrdat, ni tampoko ta hasi e bèrdat bira eror. For di tempu ku Aristoteles a bisa ku un araña tabatin seis pata, e tabatin ocho. No a kita dos pata pa obra di milager for di e araña pa duna Aristoteles rason.
3. Hopi bia den historia di mundu mayoria no tabatin rason. Si lo bo a puntra kualke hende den e tempu ei ki sorto di animal e araña ta i kuantu pata e tin, tur hende lo a kontestábo ku e ta un insekto ku tin seis pata. “I pa ki rason?” “Bueno, pasobra tur hende sabi esei. Ademas di esei e gran Aristoteles a bisa esei. Ki derechi nos tin di kuestioná e outoridat asina grandi den e asuntunan aki?”
4. Nos tin ku saminá pa nos mes loke nos ta kere, pa tin sigur ku loke nos ta kere ta bèrdat di Dios i no un opinion òf un tradishon ku a ser transmití na nos den e siglonan pasá.