“Drenta mi ofisina, por fabor,” e dòkter a bisa e mayornan di Frank. Frank tabata sinti malu hopi tempu kaba; dòkternan a hasi un estudio di su kaso i awor tabata e momentu di duna resultado di tur e saminashonnan.
Ku un tiki miedu i insiguridat e mayornan a drenta serka e dòkter ku a trata di trankilisá nan promé, pa despues duna nan e notisia fatal: “Frank tin leukemia i tin solamente un par di siman mas di bida.”
Notisia desastroso pa e mayornan di un mucha di apénas shete aña. E siguiente dianan tabata di strès, kompañerismo i despedida.
Miéntras su mama tabata prepará desayuno un mainta, el a pensa ku nunka e no a puntra Frank kiko e ke bira den bida. El a laga loke e tabata hasi i a bai seka Frank, ku tabata sinta dilanti bentana i a puntr’é: “Frank, kiko bo ke bira dia bo ta grandi?” Frank, sin pensa dos bia a bisa: “Pagadó di kandela.”
E mama a kue telefon i a bèl e stashon di pagadónan di kandela i a puntra pa e hefe.
“Mi yu tin algun dia mas pa biba i e kier a bira pagadó di kandela. No ta pusibel pa e bin bishitá boso un ratu pa e mira kon boso stashon ta?” “Nò,” e hefe a kontestá, “mi tin un mihó idea. Tuma e midí di su karson p’ami, awor di su kamisa, di su kabes. Bon, mi ta spera bo yu djarason awor mainta tempran.”
Djarason, tempran e mucha, huntu ku su mama, a bai e stashon di pagadó di kandela i pa nan sorpresa e hefe mes a bin topa nan na entrada i a hiba nan su ofisina.
“Esaki ta bo unifòrm,” el a bisa. Frank, kontentu, a bisti su unifòrm. “Ban pafó awor i laga nos wak kiko tin awe.”
Ora nan a sali for di e ofisina di e hefe, nan a mira tur e pagadónan di kandela den fila i kla pa tuma e òrdunan di dia. E hefe a duna e saludo militar i a bisa: “Frank, awe mi ta entregá e komando di e stashon akí den bo man. Loke abo bisa, esei nos lo hasi.”
E dia ei tabatin tres yamada. E promé tabata di un kandela chikitu. Miéntras nan tabata bai pa paga e
kandela e hefe a bisa Frank: “Si ami tabata e hefe, pero mi no ta, abo ta, lo mi a manda dos hòmber pariba,
dos pabou i dos lo mi a manda subi e trapi.” Frank a duna òrdu i a bisa: “Dos hòmber pariba, dos pabou i dos
ta subi trapi.” Nan a paga e kandela i bo por a mira e goso riba kara di Frank.
E siguiente kaso tabata di un desgrasia di outo. E hefe a bisa: “Frank, si mi tabata e hefe, pero mi no ta,
abo ta, lo mi a dirigí tres hòmber kòrta e outo habri i yuda saka e hendenan.” Frank ku un bos di mando a
dirigí e hòmbernan ku por a skapa bida di e hendenan den outo.
E di tres yamada e dia ei tabata di un kandela hopi grandi. Na kaminda, den e outo di e hefe el a bisa
Frank:
“E kandela akí ta grandi, mi no ta kere ku nos hendenan so lo por kuné. Si mi tabata e hefe, pero mi no ta,
abo ta, lo mi a pidi e otro stashon pa yuda nos.” Frank a tuma e maik di e radio i a yama: “Mi ta e hefe di
e stashon akí i nos mester di yudansa pa paga un kandela feros.” Ora nan a yega e sitio, tabatin sufisiente
ekipo i hende pa dominá e kandela.
Tabata un dia inolvidabel pa Frank. E pagadónan di kandela a haña hopi kariño p’e.
Despues di un par di siman su situashon a bira di tal manera ku e mester a bai hospital. Su mayornan a pasa hopi tempu kuné. Su momentunan final tabata yegando poko poko i Frank no tabatin hopi forsa mas. E zùster, ku a tende di e eksperensia ku e pagadónan di kandela, a yama e hefe i a bisa: “Señor, Frank ta hopi malu, asta e ta muriendo. Por fabor, bo por manda un di bo hendenan pa ta kuné?” Pa sorpresa di e zùster e hefe a kontestá: “Nò, no por. Mi tin un mihó idea. Spièrta e hendenan na hospital ku no tin kandela.”
Despues di un par di minüt, ata e trùk di paga kandela, a kore yega hospital ku hopi alarma. Nan a pone e
trapi na e bentana di e kamber di Frank i nan tur a drenta. Frank a smail i a hala su último rosea.
Kuantu bia nos ta pidi Hesus algu i E ta bisa: “No, mi tin un mihó idea.”
Konfia den djE, Su ideanan TA mihó.