Un dia mi a disidí di entregá. Mi kier a kita for di mi trabou, bandoná mi relashonnan, bandoná mi spiritualidat; asta mi kier a pone fin na mi bida.
Mi a bai den mondi pa mi tin un último kombersashon ku Dios.
“Dios,” mi a bisa, “Bo por dunami ún bon motibu pa mi no entregá?”
Su kontesta a sorprendé mi. “Wak rònt,” El a bisa, “Bo ta mira e lisimbein (varen) i e bambú?”
“Sí,” mi a kontestá.
“Ora mi a planta e simianan di e lisimbein i e bambú, mi a kuida nan masha bon mes. Mi a duna
nan lus. Mi a duna nan awa. E lisimbein a krese lihé for di tera. Su bèrdè briante a kubri
suela. Ainda nada a sali for di e simia di e bambú. Pero mi no a bandoná e bambú.
Den e di dos aña e lisimbein a krese mas briante i abundante. I atrobe, nada a sali di e simia
di e bambú. Pero mi no a bandoná e bambú.
Den e di tres aña ainda no tabatin nada di e simia di e bambú. Pero mi no a entregá.
Den e di kuater aña, atrobe, no tabatin nada di e simia di e bambú. I ainda, mi no a entregá.
E ora ei, den e di sinku aña, un spreit chikitu a sali for di den tera. Kompará ku e lisimbein
e tabata aparentemente chikí i insignifikante. Pero djis 6 luna despues e bambú a krese bira mas
di 100 pia haltu. El a pasa 5 aña kreando rais. E raisnan ei a hasié fuerte i a dun’é loke e
tabatin mester pa sobrebibí. Lo mi no duna niun di mi kreashonnan un desafio ku nan no por
atendé,” El a bisa mi.
'Bo sa, mi yu, ku tur e tempu aki ku bo tabata lucha, aktualmente bo tabata kreando rais? Lo mi no a bandoná e bambú. Lo mi no bandoná bo nunka! No kompará bo mes ku otronan. E bambú tabatin un propósito diferente ku e lisimbein. Sinembargo nan tur dos ta hasi e mondi bunita. Bo tempu lo yega,” Dios a bisa mi. “Lo bo lanta haltu.”
“Kon haltu lo mi lanta?” mi a puntra.
“Kon haltu e bambú lo lanta?” El a puntra mi bèk.
“Mes haltu ku e por?” mi a puntra.
“Sí”. El a bisa, “Duna Mi Gloria dor di lanta mes haltu ku bo por. I kòrda…lo mi no bandoná bo nunka, ni laga bo desampará. Nunka lo mi bandoná bo, hamas i nunka lo mi legumai bo.”
Tur hende tin dianan ku nan ke stòp, legumai tur kos. Ora tin luchanan, opstákulonan den bida, kòrda ku nos ta djis kreando raisnan! Dios tin un propósito den mente pa kada un di nos i nos mester papia kunE i yuda nos realisá e propósito ei. Kòrda semper: E lo no bandoná nos nunka, E lo no laga nos desampará nunka, i nunka E lo legumai nos.