Bo konosé e leyenda di e rito di Pasashi di e hóben Indjan Cherokee? Su tata ta bai kuné den mondi, tapa su wowonan i ta lag’é su so. E mester sinta riba un tronkon di palu henter anochi i e no mag kita e paña te ora e rayonan di solo lusa dor di dje. E no por grita pa yudansa. Unabes e sobrebibí e anochi, e ta HÒMBER.
E no por konta e otro mucha hòmbernan di su eksperensia, pasobra kada mucha hòmber mester drenta
madures riba su mes. E mucha hòmber naturalmente ta spantá. E por tende tur sorto di zonidu.
Bestianan feros siguramente mester ta tur rònt di dje. Kisas asta kualke hende lo por hasié daño.
Bientu tabata supla e yerba i tera, i tabata sagudí su tronkon, ma e tabata sinta impávido, sin kita e paña niun bia fo’i su wowo. Tabata e úniko manera ku e lo por a bira hòmber!
Finalmente, despues di un nochi teribel, solo a aparesé i el a kita e paña. Tabata e ora ei ku e a deskubrí ku su tata ta sinta riba e tronkon banda di dje. E tabata na warda henter anochi, protehando su yu for di peliger.
Nos tambe no ta so nunka. Asta ora nos no sa, Dios ta kuida pa nos, sintá riba e tronkon banda di nos. Ora problema bin, tur loke nos mester hasi ta saka nos man na djE.
Moral di e historia:
Djis pasobra bo no por mira Dios, no ta nifiká ku E no tei. “Pasobra nos ta kana pa medio di fe, no
pa medio di bista.” (2 Kor. 5:7)
