Un bia nan a puntra un hòmber ku a nase siegu kon e ta kere ku solo ta. El a kontestá: “Mi ta imaginá mi mes ku e ta mesun importante ku amistat.” E tabata konsiderá ku e gloria di solo mester tabata semehante na e lus spiritual ku, meimei di su skuridat, e tabata risibí di su amigunan. I ken por nenga ku e bondat di un amigu ta manera un rayo di lus pa e kurason?
E hendenan di tempu bieu tabata simbolisá amistat pa medio di un hóben di bon aparensia, ku riba su
bistí bo por a lesa e palabranan aki: “Pa biba i pa muri”. Riba su frenta bo por a lesa: “Den bon
tempu i den mal tempu”. I ku un dede e tabata mustra na su kurason, riba kua e tabatin skirbí:
“Leu
i serka”.
Ta asina un bon amigu ta komportá su mes: e ta ku nos den bida i den morto; ora ta bai nos bon i ora ta bai nos malu; ora e ta biba serka banda di nos òf ora e biaha bai den estranheria. P’esei, un amigu sinsero ta kompañá nos i ta enrikesé nos spiritualmente. E ta brinda nos su afekto i semper e ta leal. Su influensia ta konstruktivo i e ta yuda nos progresá. Sinembargo, ki difísil ta pa topa ku un amigu berdadero! Un ku nunka ta faya nos, ni ta traishoná nos. Un ku semper ta komprondé nos i ta apoyá nos.
Mi amigu ta fuerte, balente i sosial. E ta distinguí su mes den kualke grupo i e ta un ehèmpel perfekto di generosidat i bondat. No opstante, henter su ser ta reakshoná ku severidat dilanti di inhustisia i hipokresia.
E ta komprondé hende, i e tin konsiderashon partikularmente ku e pobernan, esnan solitario, esnan enfermo, esnan bandoná i asta ku esnan di mal reputashon. Pa bisa bèrdat, ta parse ku e ta mira algu bon den kada persona.
E amigu akí a mustrami ku amor nunka ta muri. Su amistat ta e splikashon di kuantu kos bon tin den mi bida. En realidat, e ta amigu di hopi persona ku tin sintimentunan p’e meskos ku esnan di mi, pasobra nan bida a ser transformá dor di su amistat.
E amigu di mi aki ta ser stimá i tambe odiá. Miónes di persona ta rechasá su amistat. Mi ta puntra mi mes dikon. Por ta ku nan no ta komprondé ken e ta? Siguramente ta p’esei e hendenan a mat’é. E no a hasi nada malu.
Mi debe tur kos na dje. El a revelá mi e nifikashon di bida. El a sende mi alma ku un propósito nobel. E ta dunami forsa pa pasa over di kosnan malu. El a siñami ku, no importá kiko pasa, mi por konfia den Dios komo mi Tata selestial.
Graf no por a reten’é. I pasobra El a vense morto, E por vense maldat tambe. P’esei, algun dia mundu lo ta mihó i mas felis.
Ora mi pensa riba e amigu akí, ta surgi den mi e anhelo di ku kada persona riba kara di e tera akí por konos’é. E lo no imponé su amistat riba bo. Pero si bo asept’é komo bo amigu di mas karu, e lo kompañábo te na e fin di bo dianan.
E lo hasibo felis, balente, viktorioso. E lo kambia bo bashí den satisfakshon, miedu den kurashi, debilidat den forsa, doló den alegria, konflikto den pas, i morto den bida.
Mi tin masha hopi gana pa bo konosé mi amigu. Bo sa kon yam’é? Su nòmber ta HESUKRISTU.
E parti akí, di un outor anónimo, ta pinta e beyesa di e amistat ku hende por kultivá ku Hesus. Meskos ku den tempu pasá El a kombibí ku hende, awe E ta ofresé nos su kaluroso kompania i amistat. Pasobra E no a kambia. E Palabra divino ta bisa den Hebreonan 13:8: “Hesukristu ta meskos ayera, i awe, i pa semper”.
