Durante nos bida riba e mundu akí, nos ta haña nos konfrontá ku hopi problema. Nos ta bai serka diferente hende pa yuda nos i pa haña solushon. Pero hopi bia nos ta lubidá di bai serka esun ku ta mas serka di nos. I ta esaki a pasa un bia ku e disipelnan di Hesus tambe. Nos por lesa e historia den nos Beibel, den e buki di Marko 4:35-41.
Tabata un dia den e bida di Hesus, riba kua hopi kos a sosodé. Henter dia El a siña i kura hende i ora nochi a sera, ainda e multitut tabata rònt di djE. Henter dia Hesus tabata sirbi nan i apenas El a tuma tempu pa kome i sosegá. E tabata asina kansá ku El a disidí di retirá na un lugá solitario na e otro banda dja lago. El a bisa Su disipelnan pa bai huntu kunÉ. El a manda e multitut bai i nan a hasi lihé, sali bai kunÉ den boto. Asina mes algun hende a drenta den e otro botonan di piskadó ku tabatin einan, i a sigui Hesus pa nan por tende i mira mas di djE
Hesus tabata asina kansá ku El a bai drumi dilanti den e boto i pronto El a pega soño. Tabata un anochi kalmu, dushi i tabata trankil riba e laman.
Pero diripiente a bin nubianan skur, bientu a kuminsá supla duru den e serunan i a lanta un tormento pisá riba laman. Solo a baha i tabata sukú. E olanan ku e bientu fuerte tabata manda laira, tabata dal pasa over di e boto dje disipelnan i tabata menasá di yena e boto
E piskadónan a pasa henter nan bida riba laman i a nabegá dor di hopi maltempu, pero aworaki nan forsa i abilidat no por a yuda nan. Nan speransa a kuminsá baha ora nan a mira nan boto kuminsá yena ku awa. Nan tabata konsentrá asina tantu riba nan esfuersonan pa salba nan mes, ku nan a lubidá ku Hesus tabata huntu ku nan den boto. Ora nan a mira ku tur nan trabou tabata enbano i nan a mira morto nan dilanti, nan a kòrda riba Esun ku a komandá nan pa bai otro banda dje lago. Hesus tabata nan úniko speransa. Desesperá nan a grita: “Maestro, Maestro!” Pero e skuridat profundo a skond’É fo’i nan bista. Nan stèmnan a bai pèrdí den e forsa dje tormento i nan no a haña kontesta. Duda i miedu a poderá di nan. Hesus a laga nan na kaya? E, ku a kore ku malesa, demoñonan i asta morto, no por a yuda Su disipelnan awor? Diripiente un rayo di welek a penetrá e skuridat i nan ta mira Hesus ku, apesar dje tormento, tabata drumi. Strañá i desesperá nan a grita: “Maestro, no ta importá Bo ku nos ta peresé?” (v. 38)
Nunka un hende a yega di lansa un gritu asina, sin ku atenshon a keda duná na dje. Miéntras e disipelnan a kue nan remanan pa bolbe hasi un último intento, Hesus a lanta para. E ta para meimei dje disipelnan miéntras e maltempu ta hasi su trabou, e olanan ta dal pasa over di nan i e welek ta lusa Su kara. E ta hisa Su man, ku El a uza asina tantu pa hasi bon, i E ta bisa e olanan: “Silensio, keda ketu!” (v. 39) E tormento ta para. E olanan ta kalma. E nubianan ta disparsé i e streanan ta sali. E boto ta sigui nabegá riba un laman kalmu. E ora ei Hesus ta dirigí Su mes na e disipelnan i ta puntra nan tristu: “Pakiko boso tin miedu asina? Dikon boso no tin fe?” (v. 40)
Ta reina un silensio bou dje disipelnan. E botonan ku tambe a sali pa kompañá Hesus, a pasa den mesun peliger ku e disipelnan. E rabia dje tormento a hala e botonan serka otro i tur hende na bordo a mira e milager. E hendenan a bisa otro: “Ta ken esaki ta anto, ku asta bientu i laman ta obedes’É?” (v. 41)
Ora Hesus a wòrdu lantá pa enfrentá e maltempu, E tabata kompletamente kalmu. No tatin niun rasgo di miedu den Su palabra òf mirada, pasobra no tatin miedu den Su kurason. E no a konfia riba e echo ku E tatin tur poder. E no tatin e trankilidat akí komo Maestro di tera, laman i shelu. El a pone e poder ei un banda i a bisa: “Di Mi mes Mi no por hasi nada.” Hesus a konfia riba e poder di Su Tata. Hesus tatin fe den Dios Su amor i kuido i e poder di e palabra ku a pone e tormento keda ketu, tabata Dios Su poder.
Manera Hesus a konfia riba e kuido di Su Tata, asina nos mester konfia riba e poder di nos Señor. Si e disipelnan a konfi’É, nan lo a keda trankil. Nan miedu den tempu di peliger a demostrá ku nan no tabatin fe. Den nan intento pa salba nan mes, nan a lubidá riba Hesus, i ta te ora nan a bira desesperá den nan mes, nan a dirigí nan mes na djE. I ta e orei numa E por a yuda nan.
Kuantu bia e eksperensia dje disipelnan ta nos eksperensia tambe! Ora e tormentonan di prueba bin i e welek skèrpi kòrta, ora e olanan dal pasa over di nos, nos ta lucha nos so kontra e tormento i nos ta lubidá ku tin Un ku por yuda nos. Nos ta konfia riba nos mes forsa te ora nos no tin speransa mas i nos ta na punto di senk. E orei numa nos ta kòrda riba Hesus; i ora nos yama riba djE pa salba nos, nos lo no yama enbano. Anke E bira tristu i reprendé nos riba nos inkredulidat i konfiansa propio, nunka lo E keda sin duna nos e yudansa ku nos tin mester. Sea nos ta riba tera òf riba laman, nos no mester tin miedu, si nos Señor ta biba den nos. Un fe bibu den e Salbador ta kalma e laman di bida i lo salba nos di peligernan na e manera ku E sa ku ta mihó pa nos.
Esun ku a pone e laman di Galilea bira kalmu, por kalma e olanan di tempestat den nos bida tambe.
Abo lo konfi’É ku esnan di bo?
