Hopi di nos ta bisa ku nos ta kere den Hesus. Hopi di nos ta akudí serka Hesus ku nos petishonnan, ora nos ke pa E hasi algu pa nos, pa E yuda nos. Pero kon nos kurason, nos mente ta, ora nos bai serka Hesus? Nos ta pone kondishonnan pa nos por kere den djE? Nos ke mira señalnan i milagernan, pa nos por kere di bèrdat?
Den Juan 4:46-54 nos ta lesa di un ofisial di rei ku ta bai serka Hesus pa pidiÉ bin kura su yu hòmber ku ta muriendo. E ofisial su fe ta tambaliá ora el a mira kon simpel Hesus su aparensia tabata, pa kolmo kansá i tur na stòf dor di a biaha tantu. El a duda ku Hesus lo por a hasi loke el a bin pa pidiÉ. Pero fo’i ora e hòmber a sali su kas, ya Hesus tabata konosé su fèdrit. Tambe Hesus tabata sa ku e tata tabatin sierto kondishonnan den su kurason, pa e por a kere den Hesus: si su súplikanan no keda kumplí, lo e no aseptá Hesus komo e Mesias. I Hesus a bis’é: “Si boso no mira señal i milager, boso lo no kere” (v. 48)
Apesar di tur e evidensianan ku Hesus tabata e Kristu, e ofisial a laga su fe dependé di e kumplimentu di su petishon. Tòg e ofisial akí tabatin un sierto grado di fe. El a bin pa pidi loke pa e tabata parse e bendishon di mas balor.
Hesus tabata ke a duna mas. No solamente E tabata ke a kura e mucha, sino E tabata ke tambe pa e ofisial i e hendenan di su kas tin parti den e bendishonan di salbashon. Pero e ofisial mester a mira su nesesidat promé ku e deseá e misèrikòrdia di Hesus. E ofisial akí tabata un imágen di hopi den Israel, i tambe di hopi den nos komunidat awe.
Hopi hende ta deseá di risibí un bendishon spesial dor di Dios Su poder i ta basa nan fe riba e fabor temporal ku nan lo risibí. Sinembargo, nan no ta konsiente di nan malesa spiritual i no ta mira e nesesidat di Dios Su misèrikòrdia.
E palabranan di Hesus a sende un lus den kurason dje ofisial. El a realisá ku ta su egoismo a pon’é bai buska Hesus. Deseperá el a realisá ku su duda lo por a kosta bida di su yu. I el a sklama na Hesus: “Señor, bin promé ku mi yu muri!” (v. 49). Ku fe el a tene na Hesus, i el a triunfá.
Señor no ta hala atras for di un hende ku ta tene na djE den gran nesesidat. “Bai numa,” El a bis’é, “bo yu ta bibu” (v. 50).
E ofisial a bai yen di pas i goso, manera nunka el a konosé promé. No solamente el a kere ku su yu lo a kura; el a kere firmemente den Kristu komo e Salbador
Na e mesun momentu ei, esnan ku tabata tene warda na Kafarnaum serka e mucha ku tabata muriendo, a mira un kambio diripiente i misterioso. E mucha su koló di morto a hala kita fo’i e mucha su kara. E koló di kentura a bira un brio saludabel. E wowonan dòf a bira kla i forsa a bin den e kurpa suak i delegá. Den e mucha no tabatin niun rasgo di malesa mas. Su kueru kayente, seku tabata fresku i húmedo i el a bai un soño trankil. N’e momentu di mas kayente di dia, e kentura a bai lag’é. E famianan tabata asombrá i loko di felisidat
Kanaan no tabata dje leu ei fo’i Kafarnaum i e ofisial por a yega kas e mesun anochi dje dia ku el a papia ku Hesus. Pero e no a hasi purá pa bai kas. Te su siguiente mainta el a yega Kafarnaum. I kon el a yega kas! Ora el a sali bai buska Hesus, e tabata hopi tristu. E kayente di solo tabata pars’é kruel; e kanto dje paranan tabata manera un hasimentu di chèrchi.
Awor e tabata pensa kompletamente diferente. Henter e naturalesa tabata otro. E tabata mira tur kos den un otro lus. Riba kaminda, e mainta trempan ei tabata parse manera henter e naturalesa tabata alabá Dios huntu kuné. Ora e tabata riba kaminda ainda, algun sirbidó a bin kontr’é, yen di gana di kita e insiguridat ku, según nan, lo mester tabata biba den dje.
E no a mustra sorprendí ku e notisia ku nan a dun’é, sino yen di interes el a puntra nan ki ora e yu a kuminsá mehorá. I nan a kontestá: “Ayera pa 1’or di mèrdia e kentura a lag’é” (v. 52).
Na e momentu ku e tata a aseptá e afirmashon “Bo yu ta bibu” ku fe, Dios Su amor a toka e yu ku tabata muriendo. E tata a pura pa bai kumindá su yu. El a primié na su pechu manera un yu ku a lanta fo’i morto i a keda blo gradisí Dios pa e rekuperashon milagroso akí.
E ofisial tabata ke a sa mas di Hesus. Despues, ora el a siña mas di djE, e i tur su hendenan di kas a bira disipel di Hesus. Nan kontratiempo a bira e medio pa kombertimentu di henter e famia.
Esun ku a bendishoná e ofisial na Kafarnaum, awe tin mesun deseo di bendishoná nos. Pero meskos ku e tata ku a ser probá, nos tambe tin e tendensia di buska Hesus, pushá dor di nos deseo di probecho mundano; i si nos súplika keda kumplí, nos ta konfia den Su amor.
Señor ke duna nos bendishonnan mas grandi ku nos ta pidi. Hopi bia E no ta kontestá nos mesora, pa laga nos mira kiko malu tin skondí den nos, pa asina nos bira konsiente ku nos tin mester di Su misèrikòrdia. E ke pa nos laga e egoismo, ku ta pone nos busk’É, un banda. Nos mester konfia kompletamente den Su amor dor di rekonosé ku nos no por yuda nos mes i ku nos tin mester di djE.
E ofisial kel a mira su petishon kumpli promé ku e kere, pero e mester a aseptá e palabra di Hesus ku su petishon a ser tendé i ku el a haña e bendishon.
Nos tambe mester siña e lès ei. Nos no mester kere djis pasobra nos ta mira òf sinti ku Dios ta tende nos. Nos mester konfia den Su promesanan. Si nos bin serka djE ku fe, kada súplika ta alkansá Dios Su kurason. Si nos pidiÉ pa Su bendishonnan, nos mester kere ku nos ta risibí nan i gradisiÉ ku nos a risibí nan. E ora ei nos mester sigui padilanti ku e siguransa ku nos lo risibí e bendishon n’e momentu ku nos tin mas mester di dje.
Ora nos siña hasi esaki, nos lo sa ku nos orashonnan a keda kontestá.
Dios lo hasi muchu mas pa nos “konforme e rikesa di Su gloria i según e obramentu di e forsa di Su poder” (Efesionan 3:16; 1:19).